دكتۆر فوئاد مه‌عسوم سه‌رۆكی كاتی ئه‌نجومه‌نی نوێنه‌ران ڕایگه‌یاند كه‌ ده‌ستپێكردنه‌وه‌ی دانیشتنی كراوه‌ی ئه‌نجومه‌نی نوێنه‌ران دواخراوه‌، سه‌رۆكی كاتی ئه‌نجومه‌نی نوێنه‌ران له‌ كۆنگره‌یه‌كی ڕۆژنامه‌وانیدا له‌ ڕۆژی سێشه‌ممه‌ به‌رواری 27/7/2010 له‌كۆشكی كۆنگره‌كان كه‌ تێیدا نوێنه‌ری لیسته‌ په‌رله‌مانیه‌كان ئاماده‌بوون ووتی:"پاش  ڕاگه‌یاندنی بانگه‌شه‌كه‌مان بۆ ئاماده‌بوونی سه‌رۆكی لیسته‌كان و په‌رله‌مانتاران، ئه‌و به‌ڕێزانه‌ له‌ كۆشكی كۆنگره‌كان ئاماده‌بوون، سه‌رۆكی لیسته‌ په‌رله‌مانیه‌كانیش له‌ كۆبوونه‌وه‌یه‌كدا بڕیاریاندا به‌ دواخستنی ده‌ستپێكردنه‌وه‌ی دانیشتنی كراوه‌ی ئه‌نجومه‌نی نوێنه‌ران تا ئه‌و كاته‌ی پێكهاتنێك له‌باره‌ی هه‌رسێ سه‌رۆكایه‌تیه‌كه‌ به‌دی دێت".
ئاماژه‌ی به‌وه‌شكرد كه‌ سه‌رۆكی لیسته‌ په‌رله‌مانیه‌كان پێداگریان له‌سه‌رئه‌وه‌كردووه‌ كه‌ حكومه‌تی ئێستا حكومه‌تی ڕاییكردنی كاره‌كان ده‌بێت، هه‌روه‌ك پێداگریان له‌سه‌ر پێویستی هاندانی لیسته‌كانیان كرد بۆ چڕكردنه‌وه‌ی گفتوگۆكان به‌مه‌به‌ستی گه‌یشتن به‌ پێكهاتن و په‌له‌كردن له‌ دامه‌زراندنی حكومه‌تدا.
فه‌رمانگه‌ی ڕاگه‌یاندن
ئه‌نجومه‌نی نوێنه‌رانی عێراق
27/7/2010